الطاف بھائی کے پیار میں

کراچی کے میلے میں بچھڑے ہوئے ایم کیو ایم کے بھائی ایک بار پھر مل بیٹھے تو اور کسی کو آئی نہ ہو مجھے تو الطاف حسین کی بے تحاشا یاد آئی۔ اس شہر میں جتنا پیار الطاف بھائی کو ملا ہے وہ کسی اور کو نہیں ملا۔ اگر یہ کہہ دوں کہ شہر میں جتنا خوف الطاف بھائی کا تھا ویسا خوف بھی کبھی محسوس نہیں ہوا۔ اس بات پر الطاف حسین کے دیوانے ناراض ہو جاتے ہیں اور کہتے ہیں ہمارے معصوم بھالو جیسے الطاف بھائی سے خوف کیسا۔ ایسے ہی الطاف بھائی کے دشمن حیران ہو کر پوچھتے ہیں اس شخص سے پیار کون کر سکتا ہے۔ یہ کہتے ہوئے بھی خوف آتا ہے کہ اس پیار کا مزہ ہی اور ہوتا ہے جس میں تھوڑی سی دہشت شامل ہو جائے۔ کراچی میں جتنے بچھڑے بھائی مل کر بیٹھے تھے سب اپنے آپ کو الطاف بھائی کا روحانی بیٹا کہتے تھے۔ پھر جدا ہوئے تو سب ایک دوسرے کو غدار اور را کا ایجنٹ کہنے لگے۔

پھر ایم کیو ایم پر ڈنڈا چلا تو اپنے روحانی باپ الطاف بھائی کو بھی غدار اور را کا ایجنٹ کہنے لگے۔ یہ ایم کیو ایم پر چلنے والا پہلا ڈنڈا نہیں تھا۔ ایم کیو ایم اور کراچی پر اتنے فوجی آپریشن ہوئے ہیں کہ اگر کراچی واقعی ایک مریض ہوتا تو یا تو کب کا صحتیاب ہو چکا ہوتا یا وفات پا گیا ہوتا۔ مقصد کبھی بھی کراچی کا علاج نہیں تھا صرف قبضے کی جنگ تھی۔ اور یہ جنگ اتنی پرانی ہے کہ کراچی میں پیدا ہونے والی دو نسلوں نے یہی دیکھا ہے کہ کراچی یونیورسٹی پروفیسر نہیں بلکہ رینجر چلاتے ہیں اور مرکزی کراچی کی شاندار بلڈنگ جناح کورٹس کا نام پتہ نہیں جناح کے نام پر کیوں ہے۔ وہاں تو رینجرز کا ہیڈ کوارٹر ہے۔ پاکستان میں ہر سیاست دان کبھی نہ کبھی غدار رہ چکا ہے بلکہ پاکستان میں سیاست کرنے کے لیے ضروری ہے کہ آپ کے سی وی کے ساتھ ایک غداری کا سرٹیفیکیٹ نتھی ہو۔ لیکن اب لگتا ہے کہ ملک کی سیاست میں ایک ہی غدار بچا ہے جس کا نام الطاف حسین ہے۔

نواز شریف مودی کا یار تھا، پکا غدار تھا پر جیل میں بھی تھا، وہاں سے سرنگ لگا کر نکلا اور اب لندن میں بیٹھ کر فوج کا سپہ سالار چنتا ہے۔ جنیوا جا کر سوچتا ہے کہ ہمیں ڈالر کتنے کا ملے گا، ایک جنرل مشرف تھا، غداری کا مقدمہ بھگتنے عدالت جا رہا تھا، پتلی گلی سے نکل کر دبئی پہنچ گیا اور اب سب مل کر اس کی صحت کے لیے دعائیں کرتے ہیں۔ پیپلز پارٹی والے بھی کبھی غدار کہلواتے تھے اب پاکستان کے لیے دنیا کے دل جیتنے کی ذمہ داری بلاول بھٹو کو دے دی گئی ہے۔ عمران خان کو بھی کہا جاتا ہے کہ اداروں پر تنقید کر کے وہ چھوٹی موٹی غداری کر رہا ہے، وہ کہتا ہے کہ ابھی تو میں نے کچھ کیا نہیں، میرا راستہ روکو گے تو پھر بتاؤں گا کہ غدار ہے کون۔ تو آخر میں ہمارے پاس ایک ہی غدار بچا ہے الطاف حسین جس کا نہ انٹرویو چل سکتا ہے، نہ وہ اپنے چاہنے والوں سے ٹیلیفون پر خطاب کر سکتا ہے۔ پاکستان میں کبھی آپ نے ایسا غدار دیکھا ہے جو اپنے ناکردہ گناہوں کی معافی گا کر مانگ چکا ہو۔

کیا آپ نے وہ ویڈیو نہیں دیکھی جس میں وہ گا رہے ہیں ‘ہم سے بھول ہو گئی، ہم کا معافی دے دیو۔’ اس ملک کے میڈیا پر اے پی ایس کے قاتلوں کے ترجمان کا انٹرویو چل سکتا ہے لیکن الطاف بھائی اپنے چاہنے والوں کو ‘ایک پپی اِدھر اور ایک پپی اُدھر’ بھی نہیں دے سکتے۔ الطاف بھائی کچھ لوگوں کے محبوب ہیں اور کچھ لوگوں کے لیے محض ایک مذاق۔ پیار کے دشمن انھیں اپنے عاشقوں سے نہیں ملنے دیتے اور جو انھیں مذاق سمجھتے ہیں وہ لوگوں کو ہنسنے نہیں دیتے۔ ہم نہیں جانتے کہ اب کراچی میں کتنے لوگ الطاف بھائی سے پیار کرتے ہیں اور کتنے ان سے ڈرتے ہیں۔ لیکن الطاف بھائی کے روحانی بیٹوں کا ملاپ دیکھ کر ایک دفعہ تو سب کو الطاف بھائی کی یاد آئی ہو گی اور ان پر مستقل زبان بندی کی سزا دیکھ کر تو لگتا ہے کہ ہمارے اصلی حکمرانوں کے دل میں ابھی بھی خوف ہے کہ کیا عوام کے دلوں میں ابھی بھی الطاف بھائی کا پیار زندہ تو نہیں۔

الطاف بھائی کے بھٹکے، بھولے، بکھرے روحانی بیٹے ایک ساتھ دیکھ کر وہ ترانہ بھی یاد آیا جس میں ہمیں بتایا گیا تھا کہ ‘منزل نہیں رہنما چاہیے۔’ رہنما سے تو جان چھڑوا لی اور ساتھ کراچی والوں کو منزل بھی بتا دی۔ جناح کورٹس جہاں پر گذشتہ 23 سال سے سندھ رینجرز کا ہیڈکوارٹر ہے۔

محمد حنیف

بشکریہ بی بی سی اردو

مائنس ایم کیو ایم فارمولا

بظاہر لگتا ہے متحدہ قومی موومنٹ پاکستان گرنے والی ہے۔ لیکن شہری سندھ کی مستقبل کی سیاست پر رونما اس کی سیاسی اثرات نہایت تباہ کن ہوں گے۔ فطری طور پر اس سے پاکستان سرزمین پارٹی ( پی ایس پی) کے لئے گنجائش پیدا ہو گی۔ ایم کیو ایم جو کئی بحرانوں سے گزری لیکن لگتا ہے وہ 2013 کے عام انتخابات کے بعد اور22 اگست کو ایم کیو ایم کے بانی کے نشریاتی خطاب کے اثرات بد سے باہر نہیں آسکی ہے۔ جبکہ ڈرائی کلیننگ کی دکان یا فیکٹری ایم کیو ایم کی گند دھونے میں مصروف ہے۔ ایم کیو ایم پاکستان کے رہنما جو پی ایس پی میں شمولیت اختیار کرنے کیلئے شدید دبائو میں ہیں یا ان پر دونوں کو ضم کر کے نیا نام اختیار کرنے پر زور دیا جا رہا ہے۔ پہلی بار انہوں نے دبائو کے حربے جاری رہنے پر پارٹی چھوڑنے کی دھمکی دی ہے۔

اب سوال یہ پیدا ہوتا ہے کہ ایم کیو ایم پاکستان، پی ایس پی، پی پی پی، پی ٹی آئی، جماعت اسلامی یا بالآخر ایم کیو ایم لندن کے زوال کا فائدہ کس کوپہنچے گا؟ 22 اگست کے واقعہ اور ایم کیو ایم پاکستان کے ایم کیو ایم لندن سے فاصلہ اختیار کرنے کے بعد سے جب ایم کیو ایم پاکستان کو علیحدہ جماعت قرار دیا گیا، اسے یہ بھی ’’مشورہ‘‘ دیا جا رہا ہے کہ وہ پی ایس پی میں ضم ہو جائے۔ لیکن پارٹی رہنمائوں کی اکثریت نے اسے مسترد کر دیا۔ جبکہ مختلف سیاسی جماعتوں نے ایم کیو ایم پاکستان کے فیصلے کا خیرمقدم کیا۔ اس سے یہ قیاس کیا گیا کہ انہیں نائن زیرو کے بغیر اپنا ہیڈ کوارٹر واپس مل جائے گا۔ لیکن اب تک اس حصول میں ناکام ہی رہے ہیں۔ مختلف طریقوں سے یہ بھی باور کرایا گیا ہے کہ ایم کیو ایم اورحق پرست جیسے الفاظ اور انتخابی نشان ’’پتنگ‘‘ ناقابل قبول ہوں گے؟ ایک مرحلے پر ایم کیو ایم پاکستان نے پی ایس پی کے ساتھ انضمام پر غور شروع کر دیا تھا۔
سابق گورنر سندھ ڈاکٹر عشرت العباد نے ڈاکٹرفاروق ستار کو بتایا تھا کہ ایسا کرنا تباہ کن ہو گا اور نتیجتاً سابق گورنر بھی اپنی مضبوط پوزیشن سے ہاتھ دھو بیٹھے۔

ایم کیوایم پاکستان کی جانب سے مخصوص حلقوں کا اعتماد کھو دینے کی تین وجوہ ہیں۔ اول وسیم اختر کو میئر کراچی کے منصب کے لئے نامزد کرنا۔ دوم شاہد خاقان عباسی کو وزارت عظمیٰ کے لئے اعتماد کا ووٹ دینا اورسوم آئینی ترمیم کے دوران میاں عتیق کے ووٹ پرمبینہ ڈبل گیم، اس ترمیم کی بدولت ہی نواز شریف نااہل قراردیئے جانے کے باوجود پارٹی صدر کے انتخاب کے لئے اہل ٹھہرے۔ جبکہ ایم کیو ایم پاکستان کو کراچی اورحیدر آباد کے لئے ترقیاتی فنڈز کے حصول کی توقع ہو چلی، جیسا کہ وزیراعظم اور گورنر سندھ نے وعدہ کیا۔ لیکن مخصوص حلقوں کی مزاحمت کے باعث فنڈز کا حصول اتنا آسان نہیں، میئر عہدے کے لئے ان حلقوں کی جانب سے وسیم اختر کا نام مسترد کر دیا گیا تھا۔

ایم کیو ایم پاکستان نے مسلم لیگ (ن) اورسابق وزیراعظم نوازشریف کے قریب آنے کی کوشش کی لیکن مخصوص حلقوں نے اسے اچھا نہیں لیا۔ ڈاکٹر فاروق ستار کے لئے معاملات بگڑتے چلے گئے۔ ایک طرف پی ایس پی اورمصطفیٰ کمال کیلئے مذکورہ حلقوں میں گرم جوشی اورخیرسگالی کے جذبات پائے جاتے ہیں۔ آئندہ مہینوں میں ان کا کردار پھیل جائے گا۔ مزید ارکان قومی و صوبائی اسمبلی پی ایس پی میں شمولیت اختیار کر سکتے ہیں۔ تاہم انہوں نے خود فیصلہ کیا یا انہیں کہہ دیا گیا کہ وہ کسی کو اپنی جماعتوں سے منحرف ہونے پر مجبور نہ کریں۔
پی ایس پی کو ایم کیو ایم کے روایتی حلقوں کی حمایت حاصل ہو یا نہ ہو۔ لیکن مصطفیٰ کمال ڈاکٹر عشرت العباد کو اکھاڑنے میں کامیاب ہو گئے۔ جنہیں ایک وقت اسٹیبلشمنٹ کا مکمل اعتماد حاصل رہا تھا۔ وہ اب بھی ان کی گڈ بک میں ہیں۔ محض اس لئے کہ انہوں نے ایم کیو ایم پاکستان اور پی ایس پی کے انضمام کو روکا۔

ڈاکٹر عشرت العباد کبھی مصطفیٰ کمال کے ساتھ تنازعے میں ملوث نہیں ہوئے اور بالآخر اپنی مضبوط پوزیشن کھو کر دبئی میں سکونت اختیار کر لی۔ لیکن وہ اب بھی سمجھتے ہیں کہ دونوں جماعتوں کے انضمام کا فارمولا نہیں چلے گا۔ کیونکہ ووٹرز کی نظروں میں پی ایس پی اسٹیبلشمنٹ کی کنگز پارٹی ہے۔ تاہم ذرائع کا کہنا ہے کہ ڈاکٹر عشرت العباد شہری سندھ کے ممکنہ گیم پلان کے حوالے سے اب بھی ’’رابطوں‘‘میں ہیں۔ ایم کیو ایم پاکستان آئندہ عام انتخابا ت تک بحیثیت جماعت بچ جاتی ہے اور اگر نہیں تو اسے پی ایس پی سے تبدیل کر دیا جائے گا۔ لیکن پارٹی رہنمائوں کے لئے دبائو برداشت کرنا مشکل ہوتا جا رہا ہے۔

واقعہ 22؍ اگست کے بعد ایم کیو ایم پاکستان کو متعلقہ حلقوں سے مثبت جواب نہیں ملا۔ گو کہ ان حلقوں کو بڑی حد تک یقین ہے کہ ایم کیو ایم پاکستان کی اعلیٰ قیادت ایم کیو ایم لندن کے ساتھ رابطوں میں نہیں ہے۔ جسے خود بھی الطاف حسین سے ندیم نصرت اور واسع جلیل کی جانب سے دوری اختیار کرنے کے بعد مسائل کا سامنا ہے۔ 22؍ اگست 2016 کے واقعہ کے بعد ایم کیو ایم پاکستان کو بعض حلقوں نے پی ایس پی میں ضم ہو جانے کا مشورہ دیا۔ بعدازاں یہ بھی مشورہ دیا گیا کہ وہ کوئی نیا نام بھی اختیار کر لیں۔ ڈاکٹر فاروق ستار اور ان کے رفقاء کے خیال میں ایم کیو ایم پاکستان کو مکمل طورپر لپیٹ دیا جانا مہاجر ووٹرز کو قبول نہیں ہو گا۔ 22؍ اگست کاواقعہ مہاجروں کے لئے بڑے صدمے کا باعث تھا۔ ذرائع کہتے ہیں کہ اس وقت ایم کیو ایم پاکستان کو موقع دینے کا فیصلہ کیا گیا لیکن خورشید بیگم میموریل ہال، ایم پی اے ہاسٹل حوالے کرنے اور جناح پارک عزیز آباد میں جلسے کرنے کی اجازت دینے کے مطالبے رد کر دیئے گئے۔ جبکہ ایم کیو ایم پاکستان نے الطاف حسین کی رہائش گاہ نائن زیرو کی حوالگی کا کبھی مطالبہ نہیں کیا۔ لہٰذا پہلے ایم کیو ایم نے اپنا ہیڈ کوارٹر فاروق ستار کی رہائش گاہ کے قریب پیرالٰہی بخش کالونی (پی آئی بی) منتقل کیا اور بعدازاں بہادر آباد لے گئے۔

جب سابق وزیراعظم نوازشریف ، موجودہ وزیر اعظم شاہد خاقان عباسی اورگورنر سندھ محمد زبیر خورشید بیگم میموریل ہال اور ایم پی اے ہاسٹل ایم کیو ا یم پاکستان کے حوالے کرنے پر آمادہ ہو گئے تو حکومت سندھ اور متعلقہ حلقوں نے اس کی مخالفت کی۔ ایم کیو ایم کے منحرف رکن قومی اسمبلی سلمان مجاہد بلوچ کے فاروق ستار کے لندن کے ساتھ رابطوں کے الزام میں کوئی وزن نہیں ہے۔ کیونکہ لندن والے تو انہیں فاروق کا ٹولہ قراردیتے ہیں۔ خفیہ اداروں کا قومی سیاست میں کردار شاید کم ہو گیا ہو گو کہ کچھ کی رائے میں کردار اب بھی ہے۔ لیکن عموماً کراچی اور خصوصاً ایم کیو ایم کی سیاست میں اب تک سنگین شکوک و شبہات کلبلاتے رہتے ہیں۔ چاہے وہ ’’ڈرائی کلیننگ‘‘ کاعمل ہو یا خفیہ ہاتھوں کی بات ہو۔ ایم کیو ایم پراسٹیبلشمنٹ کی تخلیق ہونے کا الزام 1978 سے لگایا جاتا ہے۔ ایم کیو ایم اوراس کے قائد کا اسٹیبلشمنٹ سے محبت اور نفرت کے اتار چڑھائو کے ساتھ تعلق قائم رہا۔

ایم کیو ایم کو توڑنے کی کوشش 1991ء میں پہلی بار اس وقت ناکام ہوئی۔ جب ’’حقیقی‘‘ کے نام سے دھڑا قائم کیا گیا۔ دوسری کوشش اس وقت ہوئی تھی جب چیئرمین عظیم احمد طارق استعمال ہوئے اور قتل کر دیئے گئے لیکن ایم کیو ایم لندن اور اس کی قیادت نے ارضی حقائق اور پاکستانی سیاست سے خود کو جدا کر لیا۔ جس کی وجہ سے 22؍ اگست کا واقعہ پیش آیا۔ الطاف حسین اور لندن میں ان کے ساتھی یہ بھول گئے کہ پاکستان مخالف بیانیہ نہ صرف ریاست بلکہ ہر پاکستانی اوران کے اپنے ووٹ بینک کے لئے بھی ناقابل قبول ہے۔ 23؍ اگست کو ڈاکٹرفاروق ستار سمیت ایم کیو ایم کی پاکستان میں قیادت نے جو کچھ فیصلہ کیا وہ درست تھا۔ اس دن سے آج تک ایم کیو ایم پاکستان کے رہنما اور کارکن مشکوک تصور کئے جا رہے ہیں اور باقی وہ تمام جو پی ایس پی میں چلے گئے۔ انہیں نہ صرف ریلیف بلکہ مقدمات سے بھی چھٹکارا مل گیا۔ یہ تمام تر پیش رفت اس جانب اشارہ کرتی ہے کہ پی ایس پی ہی کو ہی ایم کیو ایم کاممکنہ متبادل سمجھا جا رہا ہے۔ اب یہ تبدیلی ووٹرز کے لئے قابل قبول ہوتی ہے یا نہیں، یہ دیکھنا دلچسپی کا باعث ہو گا۔

گزشتہ چند ہفتوں سے ایسا لگ رہا ہے ڈاکٹر فاروق ستار اپنا اعتماد کھوتے اور مصطفیٰ کمال حاصل کرتے جا رہے ہیں۔ ایم کیو ایم کا کیا انجام ہو گا ؟ اس سے قطع نظر سیاسی اور دانشور طبقات میں یہ عام احساس ہے کہ کب تک ملکی اور خصوصاً کراچی کی سیاست میں سیاسی تجربات ہوتے رہیں گے۔ ایم کیو ایم جس نے اپنے سیاسی سفر کا آغاز ’’منزل نہیں، رہنما چاہئے‘‘ کے نعرے سے کیا تھا، اسے واقعی رہنما ملا اور نہ ہی منزل ملی بلکہ سمت ہی گم ہو کر رہ گئی ہے۔

مظہر عباس

بشکریہ روزنامہ جنگ

مشرف الطاف بھائی بھائی

جنرل مشرف کو سزا تو ہوسکتی ہے مگر انہیں گھبرانے کی یوں ضرورت نہیں کہ نوازشریف جب ان کو 1999ء کے کیس میں دل سے معاف کرچکے ہیں تو 2007ء کے کیس میں بھی ان کو صدارتی معافی تو مل ہی جائے گی مگرشرط یہ ہے کہ پہلے عدالت مشرف کو مجرم ہونے کے بعد سزا سنائے اورپھر وہ رحم کی درخواست صدر کو بھیجیں۔ مشرف کی پوری کوشش یہ ہے کہ وہ وقت ہی نہ آئے کہ فرد جرم عائد ہو مقدمہ چلے اور پھر فیصلہ آئے۔ تو دراصل اتنی مہنگی اوربڑی وکیلوں کی فوج رکھنے کا مقصد صرف حکومت اورعدالت پر دبائوڈالنا ہے کہ کسی طرح کیس شروع ہی نہ ہو اورمشرف کو عدالت میں ایک مجرم کی طرح پیش نہ ہونا پڑے۔ انہوں نے پوری کوشش کرلی ہے کہ فوج کو اپنی طرف جھکا دیا جائے مگر کھل کر نہ فوج ان کے ساتھ کھڑی ہوگی نہ حکومت کیخلاف تو اب آخری کوشش یہی ہوگی کہ علاج کے بہانے کھسک لیا جائے اور چکلالہ کی پتلی گلی سے نکل جائیں مگر حکومت والوں نے بھی کچی گولیاں نہیں کھیلی ہیں کیونکہ ایک اصلی ریمنڈ ڈیوس کی رہائی کی ذلت اٹھانے کے بعد اب دیسی ریمنڈ ڈیوس کو بھی اگر شریف برادران کے ہاتھ سے قوتیں چھین کر لے گئیں تو پھر میاں صاحب کی حکومت کی بڑی بھد ہوگی اور لوگ کہیں گے کہ یہ حکومت صرف دکھاوے ہی کی ہے اصلی طاقتیں وہی ہیں جو ہمیشہ سے رہی ہیں تو سوال اٹھے گا کہ مشرف کے مقدمے کی تجویز کس لیگی ماسٹرمائنڈ کی تھی اورکیا یہ سارا ڈھونگ اور میلہ نوازشریف کا کمبل چرانے کیلئے لگایا گیا تھا۔

تو آخری مسکراہٹ تو مشرف ہی کے چہرے پر ہوگی کیونکہ ان کو اب اپنی جان بچانے اور سزا سے بچنے کے علاوہ دوسرا ہدف تلاش کرنامشکل ہوگا مگر اس سارے کھیل میں الطاف بھائی ایک نئی طرف حالات کو گھمانے کی کوشش کررہے ہیں اوراس کہانی میں انہوں نے مشرف کا بھی ایک کردار ڈال دیا ہے یعنی اپنے دھوم دھڑکے والے بیان میں جہاں انہوں نے سندھ کے دو صوبے اور ایک نیا ملک بنانے کی دھمکی دی ہے وہیں وہ مشرف کو بھی کراچی اور مہاجروں کی سیاست میں گھسیٹ رہے ہیں۔ یوں تو مشرف کبھی اس طرح چھوٹی اور تنگ نظر، پاکستان کو مزید ٹکڑے کرنے کی سیاست میں نہ پڑتے مگر جو ایک نیا باب کھل سکتا ہے وہ کراچی کے اردو بولنے والوں کی قیادت کے حوالے سے ضرور انہیں اچھا لگے گا کیونکہ الطاف بھائی نے تو ان کی کھل کر حمایت اس لئے کی ہے کہ وہ بھی اردو بولتے ہیں اورمشرف اگریہ پیشکش مان لیتے ہیں تو یوں سمجھیں کراچی والوں کو ایک نیا لیڈر ملنے والا ہے۔ ہوسکتا ہے اس سے پہلے کہ مشرف کے مقدمے کا فیصلہ ہوالطاف بھائی مشرف کو کراچی آنے کی دعوت دے دیں اور ان کیلئے ہزاروں لاکھوں مجمع لگا کر انہیں مہاجروں کا لیڈر بنانے کی کوشش کریں یہ اس تناظر میں بھی اہم ہوسکتا ہے کہ خود الطاف بھائی کے خلاف لندن میں جو صورتحال بگڑرہی ہے وہ کسی ایسے موڑ پر آجائے کہ الطاف بھائی کو سامنے سے ہٹنا پڑجائے۔ جس طرح متحدہ کے لوگ اب لندن کی پولیس اور حکومت پر کھل کر تنقید کررہے ہیں اور الطاف بھائی اوردوسرے لیڈروں کے گھروں پر چھاپوں اورتفتیش کی شکایت کررہے ہیں اس سے تو لگتا ہے حالات بہت نازک مرحلے پر آچکے ہیں اورمتحدہ کے لیڈر اب یہ سونگھ رہے ہیں کہ ان کو متبادل قیادت کی فوری ضرورت ہے۔ مجھے نہیں لگتا کہ جنرل مشرف اس طرح کی سیاست بھی کرسکتے ہیں مگروہ دن بھی تو یاد کریںجب وہ 12مئی2007ء کو اسلام آباد کے جلسے میں مکے لہرا کر دعویٰ کررہے تھے کہ کراچی میں انہوں نے اپنی طاقت کا کیسا مظاہرہ کیا ہے۔ وہ طاقت متحدہ ہی کی تھی اورمشرف کے لگائے ہوئے متحدہ کے گورنر تو ابھی تک موجود ہیں اور ان کو نہ پیپلزپارٹی کی حکومت اور نہ ہی ن لیگ ابھی تک ہٹاسکی ہے تو اگر مشرف کو بالکل ہی دیوار سے لگادیا گیا یعنی ملک سے باہر نہ جانے دیا گیا‘ سزا سنادی گئی اور اتنی مٹی پلید کردی گئی کہ وہ رحم کی درخواست کرنے پر مجبور ہوگئے تو یہ کوئی ناقابل یقین بات نہیں ہوگی کہ وہ کھل کر مہاجروں کی سیاست میں چھلانگ لگادیںکراچی کی باگ ڈور سنبھال لیں اورالطاف بھائی کو یقین دلا دیں کہ وہ ان کے خواب کی تعبیر پوری کرسکتے ہیں حال ہی میں لندن سے ایک دوست تشریف لائے تو انہوں نے ایک مزیدار کہانی سنائی وہ اس الطاف مشرف بھائی بھائی کے موضوع پر تھی مگر یہ وہ دور تھا جب مشرف تو چاہتے تھے کہ وہ متحدہ کے قریب آئیں مگر الطاف بھائی ان کو کسی طرح کا خطرہ سمجھتے تھے۔دوست نے بتایا کہ لندن میں ایک بچی کی سالگرہ تھی اور دونوں مشرف اور الطاف بھائی کو بلایا گیا تھا اور دونوں نے آنے کی اطلاع دے دی تھی۔ مشرف پہلے آگئےاورسب سے مل کر بیٹھ گئے۔

الطاف بھائی سب سے آخر میں آئے اور بھانپ کر کہ مشرف پہلے سے بیٹھے ہیں انہوں نے وہ ڈرامہ رچایا کہ سب کو یاد رہے گا۔دروازے میں سے انہوں نے بلند آواز میں پہلے تو بچی کو مبارکباد دی پھر ان کے والدین سے ملے پھر تمام شرکاء سے ایک ایک کرکے ہاتھ ملایا اور آخر میں جب مشرف کے پاس پہنچے تو انگلیاں ملا کر پھر دوسرے پروگرام میں مشغول ہوگئے۔یہ پیغام صاف تھا کہ لیڈر متحدہ کا میں ہوں اور کوئی جنرل کرنل یا سابق صدر میرا انتظار کرے جب میں چاہوں گا مل لوں گا‘ مگر یہ کچھ عرصہ پہلے کی کہانی ہے اب شاید الطاف بھائی کو مشرف کی ضرورت پیش آسکتی ہے یا آگئی ہے۔تو غداری کے مقدمے سے تو مشرف نکل ہی جائیںگے یا سزا بھی ہوگئی تومعافی مل سکتی ہے مگر الطاف بھائی کیلئے اب مہاجروں کی سیاست سے دوبارہ قومی دھارے میں آنا مشکل ہوتا جارہا ہے وہ سارے پنجاب اوردوسرے صوبوں میں متحدہ کے آفس کھولنے اورجلسے کرنے کا زمانہ لگتا ہے گزرگیا۔ اب انہوں نے جناح پور یا مہاجرستان یا مہاجر صوبے کی کال تو دے دی ہے اوران کو کوئی تگڑا مہاجر لیڈر بھی چاہئے جو ان کے مشن کو سنبھال سکے اور آگے لے جاسکے کیونکہ اگر وہ کامیاب ہوتے ہیں جو انتہائی مشکل بلکہ ناممکن ہے تو وہ لندن چھوڑ کرآبھی سکتے ہیں اگرفرض کریں ان کے خلاف لندن میں کوئی کیس بھی چلتا ہے اورسزا بھی ہوجاتی ہے تو زیادہ سے زیادہ دو تین سال انہیں پابند سلاسل رہنا پڑے گا۔ پیسوں کے آگے پیچھے کرنے اورمنی لانڈرنگ کی سزا بھی اتنی ہی ہے وہ سزا کاٹ کر بھی واپس آسکتے ہیں اگرمشرف کی طرح کا کوئی لیڈر ان کی غیرموجودگی میں مہاجر سیاست کو آگے چلاتا رہے۔ کچھ ان کے دوست جو ناراض ہوکر کراچی چھوڑ گئے ہیں جیسے مصطفیٰ کمال یااوردوسرے وہ بھی واپس آسکتے ہیں تو الطاف بھائی نے آخری پتہ تو پھینک دیا ہے مگر کھیل اب شروع ہوگا مشکل میں نوازشریف آگئے ہیں اگر مشرف رہتے ہیں یا جاتےہیںسیاسی اثرنوازپرہوگااوراگر کراچی زیادہ ہی آپے سے باہر ہونے لگا تو بھی نواز کو ہی سنبھالنا ہوگا۔اب ان سے جو کچھ ابھی ہے وہ تو سنبھل نہیں رہا طالبان سے معاہدہ ہو بھی جائے اورکراچی کا محاذ کھل جائے تو گھاٹے کا ہی سودا ہوگا۔

شاہین صہبائی

بشکریہ روزنامہ ‘جنگ

Pervez Musharraf and Altaf Hussain

Chaman Main Didha War By Talat Hussain

Chaman Main Didha War By Talat Hussain